قصص واقعية قصيرة " الجزاء من جنس العمل "

 

- قصتنا انهاردة عن بنت جميلة اسمها دينا حبت شاب اسمه فهد لكن مشكلته إن اللي هتتجوزه هتسكن مع مامته لكن دينا عشان بتحبه وافقت تتجوز فهد وتسكن مع مامته وبعد الجواز بفترة ابتدت المشاكل بين دينا وحماتها وابتدت دينا مش عارفة تتعامل مع حماتها ، بقت بتحصل خناقة كل يوم بينهم لدرجة ان دينا فكرت تسيب البيت وتطلب من فهد يشوفلها شقة لوحدها لكن فهد ظروفه متسمحش انه ياخد شقة تانيه فأقنعها انها تستحمل مامته شوية وهو هيتكلم مع مامته ويقنعها انها تتعامل معاها كويس ،بعد مافهد اتكلم مع دينا ومامته استقرت الأمور شوية لكن بعد فترة رجعوا يتخانقوا تاني وزادت خناقاتهم اكتر من الأول عشان كدة فكرت دينا في فكرة شيطانية وراحت لصاحب باباها دكتور صيدلي كبير اسمه دكتور لطفي  في السن وصديق للعيلة من زمان فقالتله :-

* دينا :-انا وحماتي بنتخانق كتير وهي بتضايقني علي طول وميبقاش ينفع في البيت الا ياانا ياهي .

* دكتور لطفي :- معلش يا دينا استحمليها شوية ست كبيرة .

* دينا :- انا استحملتها كتير لكن هي بتكرهني. 

* دكتور لطفي :- أيوة يا دينا يعني انتي عايزة ايه دلوقتي .

* دينا :- عايزة سم يكون بطئ المفعول عايزة اخلص منها كفاية عليها كدة .

* دكتور لطفي:- بس ده خطير عليكي يا دينا .

* دينا :- ماانا عايزة دوا ميخليش حد يشك انها ماتت مسمومة .

* دكتور لطفي:- ماشي يا دينا طلبك موجود بس كل اللي عايزه منك وانتي بتدي حماتك السم انك تعامليها كويس كأنها امك ومتزعليهاش خالص ولو ضايقتك راضيها عشان لما تموت محدش يشك فيكي وانا دلوقتي هحضرلك الدوا.

* دخل دكتور لطفي يحضر الدوا في المعمل وبعد تحضير الدوا خرج لدينا بازازة صغيرة .

* دكتور لطفي:- خدي الازازة دي وزي مااتفقنا هتحطي نقطة واحدة لمدة شهرين. 

* دينا :- ماشي ياعمو اتفقنا .

* خدت دينا الازازة ومشيت وابتدت تنفذ خطتها كل يوم نقطة في الأكل وبقت بتعامل حماتها حلو جدا وكمان بقت بتستحملها لما بتتعصب عليها عشان لما تموت يبان انها كانت بتحبها وقلت خناقاتهم خالص وبعد شهر جريت دينا علي دكتور لطفي وقالتله :-

* دينا :- الحقني ياعمو انا مابقتش عايزة حماتي تموت شوفلي حاجة تخلصها من السم .

*دكتور لطفي:- مش انتي اللي طلبتي كدة ايه اللي حصل خلاكي تغيري رأيك  

* دينا :- حماتي بقت بتحبنى وبقت بتعاملني كويس اوي وبقت بتخاف علي زعلي .

* دكتور لطفي:- حماتك بقت بتحبك وبتعاملك كويس لما انتي عاملتيها كويس وحاولتي تحبيها  يا بنتي الجزاء من جنس العمل يعني انتي لماحبتيها هي كمان حبتك من قلبها .

* دينا :- وايه العمل دلوقتي انا غلطت وعايزة أصلح غلطتي .

* دكتور لطفي:- طالما اعترفتي بغلطك وفهمتي الدرس انا هفهمك، انا يابنتي اديتك ازازة فيها مياه مقطرة مش سم عشان مينفعش كنت امشي وراكي في ضياع نفسك وضياع غيرك .

* دينا :- شكرا جدا ياعمو بس انت عملت كدة ليه .

* دكتور لطفي:- عشان مهما حاولت اقنعك عمرك ما كنتي هتقتنعي بالكلام ده فكان لازم تجربي بنفسك وكنت عارف انك هتتراجعي عن اللي في دماغك .

*شكرت دينا دكتور لطفي وبعدها روحت بعد ما فهمت درس عمرها وبقت بتتعامل مع حماتها كانها امها وبيتهم استقر وجوزها بقي فرحان بيها جدا .

- خلاصة الكلام أن لازم نفهم أن الجزاء من جنس العمل يعني لو ادينا حب هناخد حب ولو ادينا حب واهتمام هناخد حب واهتمام وهكذا ، لكن لو استنينا الحب من غير ما نديه يبقي عمرنا ماهناخد اي مشاعر حلوة من حد .